هيءَ ڪانگريس 1818ع جي سرءُ ۾ منعقد ڪئي ويئي. اِن ۾ يورپ جي چئن وڏين طاقتن، روس، برطانيا، پروشيا ۽ آسٽريا پاران سڄي يورپي کنڊ تي گڏيل حڪومتي سرشتو قائم ڪرڻ لاءِ ڪجهه فيصلا ڪيا ويا. ان ڪانگريس ۾ نئپوليئن جي شڪست کان پوءِ فرانس ۾ موجود اتحادي فوجن کي فرانس مان نڪرڻ لاءِ چيو ويو ۽ ساڳئي وقت فرانس کي ٻيهر يورپي معاملن ۾ ڀاڱي ڀائيوار ڪيو ويو. ان کانسواءِ نئپوليئن کي قيد رکڻ، يهودين جي حقن بابت جرمنيءَ کان خاطري وٺڻ، يورپ جي انقلابي تحريڪن کي چٿڻ ۽ لاطيني ۽ ڏکڻ آمريڪا ۾ موجود اسپيني بيٺڪن ۾ روسي مداخلت جي امڪانن کي مُنهن ڏيڻ وارن معاملن تي سهڪار بابت سهمتي ظاهر ڪئي ويئي. اِنهيءَ نالي سان هيءَ ٽين ڪانفرنس هُئي. ان کان اڳ ٻه ڪانفرنسون ترتيب وار 1668ع ۽ 1748ع ۾ ساڳي جاءِ تي ٿي چُڪيون هيون. ان ڪانفرنس ۾ آسٽريا جي چانسيلر ميٽرنخ، جرمن مارشل هنڊن برگ، برطانيا جي ڊيوڪ آف ويلنگٽن، روس جي زار اليگزينڊر ۽ ٻين معتبر هستين پنهنجن پنهنجن مُلڪن جي نمائندگي ڪئي.